Certifikimi

1. Publikimi i thirrjes publike – komitetet teknike do të publikojnë një thirrje publike në faqet e tyre të internetit për ofruesit e shërbimeve të interesuar. Thirrja publike për shprehjen e interesit do të publikohet gjatë vjeshtës së vitit në kurs dhe do të jetë e hapur për një muaj. Stafi i sekretariateve teknike do të jetë i disponueshëm për të përgjigjur pyetjeve dhe për të dhënë sqarime.
2. Aplikimi për certifikim – ofruesit e shërbimeve të interesuar do të gjejnë formularin e aplikimit në faqet e internetit për secilën nga 5 kategoritë e standardeve. Formulari i plotësuar me dokumentacionin shoqërues duhet të dërgohet në një adresë të caktuar e-maili. Dokumentacioni shoqërues dhe afati për dorëzimin e aplikimeve do të përcaktohen nga thirrja publike.
3. Kontrolli administrativ i aplikimeve – pas mbylljes së afatit për dorëzimin e aplikimeve në afatin e caktuar në thirrjen publike, komitetet teknike do të kryejnë kontrollin administrativ të aplikimeve të ardhura. Aplikuesve që kalojnë kontrollin teknik do t’u ofrohet një Marrëveshje për certifikim. Pas nënshkrimit të Marrëveshjes do të bëhet një listë e ofruesve të shërbimeve dhe një plan dinamik vizitash.
4. Përgatitja për zbatimin e BFS – stafi i komiteteve teknike do të dalë në terren për të parë gjendjen e objektit të ofruesit të shërbimeve të regjistruar dhe për të dhënë një rekomandim të shkruar se çfarë duhet të bëhet/të ndryshohet për të përmbushur kushtet.

5. Përgatitja e objektit të ofruesit të shërbimeve të regjistruar – ofruesi i regjistruar i shërbimeve do të ketë një afat prej 1-3 muajsh, në varësi të tipit të standardit, për të përmbushur kërkesat sipas kritereve, dhe pas përfundimit dhe përmbushjes së rekomandimeve do të njoftojë sekretariatin teknik.
6. Vlerësimi i ofruesit të shërbimeve të regjistruar – një vlerësues i pavarur do të dalë në terren dhe do të kontrollojë nëse ofruesi i shërbimeve ka përmbushur të gjitha kushtet për atë lloj standardi brenda afatit të caktuar në thirrjen publike. Në rast se të gjitha kushtet janë përmbushur, vlerësuesi do të njoftojë me shkrim sekretariatin teknik. Në rast se nuk janë përmbushur, do t’i jepet një afat shtesë ofruesit të shërbimeve për të bërë rregullimet dhe për të finalizuar atë që nuk është përmbushur.
7. Dhënia e certifikatës BFS dhe tabelës – sekretariati teknik do të japë një certifikatë, një tabelë me shenjën BFS dhe një tabelë informative. Mbajtësi i shenjës do të regjistrohet në faqet e internetit të sekretariateve teknike. BFS është e vlefshme për 2 vjet pas së cilës është e detyrueshme ricertifikimi, dhe çdo ricertifikim është i vlefshëm për 3 vjet.
8. Anulimi i certifikatës BFS – në rast se sekretariati teknik merr një ankesë zyrtare, ndaj mbajtësit të standardit, sipas rregullave të përcaktuara, në rastin e çdo ankese mbajtësi i shenjës do të paralajmërohet me një urdhër për të korrigjuar mungesën. Nëse, brenda një viti, mbajtësi i shenjës nuk përmbush tre (3) urdhra për korrigjimin e mungesave, certifikata do të anulohet automatikisht.